المطرب البشير عبدو

البشير عبدو مطرب مغربي من مواليد مدينة مراكش، قدم للريبطوار الغنائي المغربي مجموعة متنوعة من بينها "وانت دايز، احنا مغاربة، يا اهلي وخوتي.." وغيرها من الأغاني الراسخة في أذهان الجمهور المغربي، الذي يحفظها عن ظهر قلب، لجديتها وكلماتها القوية، ويستعد قريبا لطرح ألبوم غنائي جديد"

بديتي بالتجويد ومن بعد قلبتيها غناء، واش ممكن في هاذ المرحلة العمرية ترجع لقراءة القرآن وتقول الرجوع لله؟
أنا عمرني ماكنت مقرئ، ولكن يمكن نقول كنت معجب بالمقرئين وبأصواتهم الجميلة سواء في المشرق أو عندنا هنا في المغرب، وفي بداية حياتي كنت كنقلدهم بزاف وهاذيك هي المدرسة ديالي الأولى، ثم من بعد مشيت في اتجاه الأغاني الجادة والهادفة، ولكن هذا ما كيمنعش أنني لازلت إلى الآن أترنم بقراءة آيات الذكر الحكيم بما أن الله عطاني الصوت الجميل وفضلني به على بزاف.

سميتك الحقيقية بشير لمجرد، علاش بدلتيها بعبدو وما رضيتيش بالسمية اللي اختارها بابا جدو؟
لا حاشى علاش مانرضاش بسميت الجدود، غير وكان هاذيك مسألة كانت دارجة في الوسط الفني، لما كيظهر شي موهبة في الغناء أو أي مجال من المجالات الفنية كيحاول يدير شي اسم خفيف باش الجمهور يتقبلو ويحفظو بكل سهولة، وفي الحقيقة ماشي أنا للي اختاريت الاسم أنا كنت باغي ندير البشير المراكشي، ولكن الجوق الوطني هو للي اختار لي البشير عبدو حيث شافو فيه المقومات الفنية للي غادي تساهم في انتشاري بسهولة.

سنين وانت كتغني معمرك فكرتي تطرح ألبوم غنائي حتى لهاذ السنة، دابا عاد، واش ماكتشوفش أنك كتلعب في الوقت بدل الضائع؟
الإنسان ما حدو في الحياة وهو كيطمح يدير الجديد في المجال ديالو سواء كان فنان أو رياضي، الطموح إيلا توقف فمعناه أن الإنسان مات، وأنا الحمده لله مازالني في الحياة ومازال عندي مشاريع فنية باغي نقدمها لهاذ الجمهور، ومنها هاذ الألبوم، كنت ناوي باش يخرج في 2012 ولكن باقي لحد الآن ماخرجش للأسواق، لأنه كاينة أشياء خارجة على الإرادة ديالنا، ولكن أنا أصلا ما دايرش هاذ الألبوم بهدف مادي، وإنما لهدف فني بحت، درتو بطريقة جميلة بتقنيات جميلة، هذا هو الهدف ديالي وكنظن أنه غادي يكون عند حسن الظن.

جرعة الوطنية كثيرة في الأغاني ديالك، واش انت وطني بزاف أو متملق بزاف؟
أنا مغربي بزاف، في الحقيقة مادرتش هاذ النوعية من الأغاني غير باش يحبوني الناس ولو أن حتا هاذا هدف مشروع، ولكن درتها باش نساهم في ترسيخ قيم الوطنية، ونوصلها لكل الفئات. ماكاينش ما احسن من الروح الوطنية ياريت تكون كل الأجيال كتتحلا بيها.

يا سلام عليك.. فعلاش إذن الابن ديالك تزوج بباكستانية، واش ماشي قمة الوطنية أنه كان يتزوج وحدة مغربية ويساهم في القضاء على العنوسة في هاذ الوطن؟
زواج ولدي في مرحلة من عمره بباكستانية ما يمكنش يشكك في انتماءو للمغرب، حيث في بداية الشباب كلنا كنمرو بفترة كنبداو نسكتشفو فيها نفوسنا ونستكشفو فيها الآخر، وولدي سعد مللي كان كيدرس في أمريكا تلاقى مع بزاف، ومنهم هاذيك البنت الباكستانية، وتزوجها، ولكن زواجهم استمر فترة قصيرة، سعد الآن ما بقاش مزوج بيها، كنتمناو في المستقبل بيد ما يرسي رجليه في الوسط الفني عاد يمكن لينا نفكرو أننا نديرو ليه شي عرس رائع يحضروه كل الناس، وأكيد غادي تكون الزوجة المختارة مغربية باش تبقى الجذور ديالنا مركزة في هاذ البلاد.

أغانيك العاطفية قليلة، واش هاذ القلة سببها انعدام مهيجات العاطفة في حياتك الشخصية؟
بالعكس أنا الجانب العاطفي حاضر في حياتي الشخصية وكيغذيه الحب الدائم بيني وبين شريكة حياتي الفنانة نزهة الركراكي، وأنا انسان رومانسي وحساس كما هو حال كل الفنانين، ويمكن هذا الاحساس هو للي كيميزنا على باقي البشر، فبالتالي حتى اختياراتي الغنائية كنظن أنها كتعكس هاذا الجانب اللي ماشي خفي فيا، والحمده لله الريبرطوار الغنائي ديالي متنوع، كنغني في جميع المواضيع، الوطني الاجتماعي الديني، وحتى العاطفي واخد حقو في الأغاني ديالي.

علاش اختارتي انت والمدام يكون عندكم الإبن الوحيد واش غادين مع سياسة تحديد النسل؟
هاذيك الإرادة ديال الله سبحانه وتعالي، ماشي الاختيار ديالنا، لأنه لو كان بايدينا كون راه دابا عندنا عشرة ديال الأولاد في الدار، ولكن الحمده لله الواحد ما يعرف الخير فين كاين

اغنية يا عجبا اداء المطرب البشير عبدو

» الاستاد البشير بلعباس الطعارجي
» المطرب الراقي عبد اللطيف غرنيط