وجدت صعوبة في مدكم بقصيدة عيون المهرة مغناة ؛ وإليكم الآن واحدة من أروع قصائد المديح الديني من نظم طود من أطواد شعر الملحون الشيخ الجيلالي امتيرد المراكشي عاش في القرن 18 و عاصر السلطان سيدي محمد بن عبد الله
سأحاول مشاركتم متعة الاستماع إلى هذه آلقصيدة بصوت شيخ الكريحة بمراكش الفنان الحاج امحمد الملحوني
قصيدة حُبْ احْبِيبْ الرَّحْمَانْ
نظم الشيخ الجيلالي امتيرد مبيت رباعي
القسم الأول
حُبّْ احْبِيبْ الرَّحْمَـانْ خَمَّرْنِي يَا لَخْـــوَانْ وَسْقَانِي مَنْ جَـرْيَــــانْ يَا مَحْلاَهْ ابْجَرْ جُـــــونْ
خَرْقْ اجْــوَارَحْ لَبْدَانْ وَدْعَانِي يَـا فَطَّــانْ نَنْشَدْ قَلْبَنْ وَلْسَـــــانْ بَحْلاَوَتْ كُلّْ الْسُــــــونْ
مَنْ فَتْرَقْ بَالْفُرْقَـانْ وَتْجَلَّى عَلْ لَدْيَــانْ وَعْبَقْ فِي كُلّْ اوْطَانْ طِيبُ مَنْ جُونْ الْجُونْ
وَضَّحْ عَلْمْ لقُرءَانْ شَرْحُ وتَفْسِيرْ ابْيَـانْ وَخْشُوعْ الْهَلْ لِيمَــانْ مَنْ اَمَّنْ بِهْ احْصُـــونْ
جَدّْ حْسِنْ وَلَـــحْسَنْ كَهْفْ الْجُودْ وُلَحْسَانْ حَرْمْ الْبِيتْ وُ لَرْكَــــانْ مَنْ دَارَتْ بِهْ اهْبُـونْ
صَلِّوْ عْلَى الْعَدْنَــانْ مَنْ جَانَا بَالْبَيَـــانْ نَمْدَحْ مُولْ الْفُرْقَـــانْ طَــــهَ مَفْتَاحْ الْكَـوْنْ
القسم الثاني
مُحَمَّدْ صَاحَبْ لَحْقَايَقْ وَالتَّحْقِيـــــقْ السَّابَقْ لَلْعْبَادْ فَضْلُ وَكْمَـــــالُ
جِيَّدْ وَافِي احْنِينْ وُمْكَرَّمْ وَشْفِيـــــقْ السَّاقِي مَنْ الْحُوضْ كِيسَانْ امْصَالُ
مَفْتَاحْ الدِّينْ صَادَقْ اقْوَالْ التَّصْدِيقْ بَاهِي لَوْصَافْ مَنْ اسْعَدْنَا بَوْصَــالُ
مَا خَلْقْ اللهْ حَدّْ مَثْلُ وَبْحَال
نُورْ الْحَقّْ الدِّيَّانْ رُوحْ الْقُدْسْ وُ لَجْنَانْ رَحْمَا وَعْفُ وَمَـــانْ شَرْحْ الْوَدّْ الْمَصْيُونْ
عْظِيمْ الْقَدْرُ وشَانْ سِيدْ اعْجَامْ وُ عَرْبَانْ سِيدْ اجْمِيعْ التَّقْــلاَنْ مَا حَمْلَتْ بِهْ اَبْطُـونْ
فَصْلاَتُ يَا انْسَانْ كَتَّرْ جَهْرْ وُكَتْمَــانْ بِهَا اِدَهْبْ الشَّيْطَـانْ غَاضَبْ نَاكَدْ مَمْحُونْ
هِيَّ شُرْبْ الَّهْفَانْ هِيَّ كَنْزْ الَّحْقَـــانْ هِيَّ الْفَرْحْ وُ سَلْوَانْ هِيَّ الرَّحَا وَسْكُـونْ
يَوْمْ الْفَزْعْ وُ لَفْتَانْ وَالصِّرَاطْ وُمِــيزَانْ نَسْعَى اللهْ الْغُفْرَانْ عَنَّا لَصْعَابْ اتْهُونْ
صَلِّوْ عْلَى الْعَدْنَانْ مَنْ جَانَا بَالْبَيَـــانْ نَمْدَحْ مُولْ الْفُرْقَــانْ طَهَ مَفْتَاحْ الْكَـــوْنْ
القسم الثالث
طَهَ دَبَّابْهَا نْهَارْ يْضِيقْ الْحَــــــالْ فِي يُومْ اَلاَّ تْفِيدْ مَخْلُوقْ انْدَامَـا
مَا بِينْ الاَنْبْيَا ضْوَى خَاتَمْ لَرْسَالْ كَابَدْرْ اوْسِيمْ حِينْ تَعْظَمْ لَقْيَامَـا
اَنَا لِهَا يْقُولْ طِيَّبْ كُلّْ افْعَـــــــــالْ تَتْبَاشَرْ بَالْهْنَا وَ عْفُ وَسْلاَمَا
وَكْمَالْ اشْفَاعْتُ مَنْ اللهْ اكْرَامَا
طَبُّ شَافِي لَدْهَـــانْ وَدْوَى غَايَتْ لَبْدَانْ وَجْبِيرَا لَلْكَسْـــرَانْ قَصْدْ اكْمَالْ الْمَضْنُونْ
بَحْرْ الْوَدّْ الْهَتَّـــانْ مَنْ لاَ مَثْلُ سَلْطَانْ الزَّايَدْ لَلْعَرْفَــــانْ مَنْ عَلْمُ كُلّْ افْنُــــونْ
لِيلْ اسْرَى بَالسَّرْيَانْ رَتْفَعْ لَسَّبْعْ امْتَـانْ يُومْ احْرَمْ بَالْجَمْعَــانْ صَلَّى وَسْعَدْ مَامُــــونْ
تَمّْ ادْنَاهْ الْمَنَّـــانْ لَبْسَاطُ لِهْ امْكَـانْ قَلْبُ يَسْمَعْ يَقْضَـــانْ وُ يَنَاضَرْ دُونْ اعْيُــونْ
تَمَّا طْلَبْ الْحَنَّــانْ كَرْمُ وَرْجَعْ فَرْحَـانْ لَقْرِيشْ احْكَى عَزْمَانْ فَضْلْ الدِّينْ الْمَصْيُــونْ
صَلِّوْ عْلَى الْعَدْنَانْ مَنْ جَانَا بَالْبَيَـــانْ نَمْدَحْ مُولْ الْفُرْقَــانْ طَهَ مَفْتَاحْ الْكَـــوْنْ
القسم الرابع
احْبِيبْ اللهْ لاَ نْبِي مَثْلُ مَحْبُـــوبْ السَّابَقْ فَاللَّوْلِينْ نَاسْ الْعَرْفَانِي
مَنْ قْبَلْ اَلاَّ يْزِيدْ نَطْقَتْ بِهْ اكْتُوبْ كْمَا خَلْقُ انْشَاهْ نَعْمْ الْوَحْدَانِي
عَرْفُوهْ وُ كَدّْبُ وَجَحْدُ هَلْ لَـكْدُوبْ وَاشْ اِيْجَحْدُ فْطَلْعْتْ الْبَدْرْ السَّانِي
لَوْلاَهُ مَا يْكُونْ شِي مَنْ لَكْوَانِي
هَدَا هَازَمْ لَوْتَــــانْ عَنْدْ اللهْ مَالُ تَانْ لَوْلَى فَضْلُ لاَ كَــانْ فَارَغْ وَلاَ مَشْحُـونْ
دِينْ الْمُولَى قُدْسَـــــانْ بِهْ اتْبَهَا وَزْيَانْ وَجْنُودْ اَهْلْ الصَّلْبَانْ مَا مَلَّتْهُمْ اسْنُــونْ
لَوْ صَبْتْ امْنَ الْبِيزَانْ اِيْعِيرُ لِي جَنْحَانْ وَنْفَدْفَدْ بَـــالطِّيرَانْ وَنْغَمَّقْ بِينْ امْــزُونْ
نَنْظَرْ نَجْمْ السَّرْطَـــانْ وَنْقُولْ ابْلاَ تُونَانْ دَاخَلْ حَرْمَكْ خُوفَـانْ مَدَّاحَكْ لِيسْ يْهُونْ
لَعْقَلْ عَنْدِي هَيْمَـــــانْ وَنَا سَاهِي غَفْلاَنْ لَعْمَرْ امْضَى خُسْرَانْ ونَا يَاسَرْ مَدْيُــونْ
صَلِّوْ عْلَى الْعَدْنَـــــانْ مَنْ جَانَا بَالْبَيَــانْ نَمْدَحْ مُولْ الْفُرْقَــانْ طَهَ مَفْتَاحْ الْكَـــوْنْ
القسم الخامس
صَلَّى اللهْ عْلِيهْ قَدّْ مَّا يُدْكَــــــــــارْ وَمَا فِي عَلْمْ مَنْ اتْجَلَّى بَـــــــدْوَامُ
بِهَا نَخْتَمْ وُ نَحْجَبْ حُلَّتْ لَسْـــرَارْ تَنْوِيرْ السَّرّْ مَنْ الْمَبْدِ لَتْمَــــــــــامُ
هِيَّ الرَّسْمَالْ وَالْغْنَى هِيَّ التَّحْرَارْ بَرْكَا وَزْكَى لْمَنْ اقْوَى عَشْقْ اغْرَامُ
غَدَّا يُومْ النّْشُورْ بِهَا نُرْحَامُ
يَا رَبِّي بَالسَّبْطَـــانْ وَالْفَارُوقْ وُ عَثْمَـــانْ وَكْلِيمَكْ بَنْ عَمْـرَانْ وَسْلِيمَانْ وُ هَــارُونْ
يُومْ الرَّمْسْ وُ لَكْـفَانْ بِينْ الْمَلْكِينْ اتْنَـانْ تَبَّتْنِي لَلسُّـلاَنْ لاَ تَجْعَلْنِي مَفْتُــونْ
وَالْوَلَدْ امْعَ الْوَلْـــدَانْ وَالاِسْلاَمْ وُلَــخْوَانْ اِيْغَافَرْ لَلْعَصْيَــانْ غَفْرْ اخْطَانَا وَزْبُـونْ
الجِّيِلاَلِي سَتْعَـــانْ بِكْ اعْلِيكْ التَّكْــلاَنْ مَدَّاحَكْ مَا يُوهَــانْ عَنْدْ ارْوَاحُ مَضْمُـونْ
اسْلاَمْ الْهَلْ لَـــوْزَانْ وَالطَّلْبَا وَالْعَرْفَــانْ وَعْلَى الشَّرْفَا تِيجَانْ هَلْ لَفْرَايَضْ وَسْنُونْ
وَصْلاَتْ ادْعَجْ لَعْيَانْ مَا هَيْلَمْ اَنسْ وُجَانْ مَا فَصْلاَةُ نَكْـرَانْ وَالنَّاكَرْهَا مَلْعُـــونْ
صَلِّوْ عْلَى الْعَدْنَـــانْ مَنْ جَانَا بَالْبَيَـــانْ نَمْدَحْ مُولْ الْفُرْقَــانْ طَهَ مَفْتَاحْ الْكَـــــوْنْ
موضوع: قصيدة حُبْ احْبِيبْ الرَّحْمَانْ 
الثلاثاء ديسمبر 04, 2012 8:54 am
