زجلية حول مراكش

مراكش

أحسن م شافت عينــي
بين البلدان
وردة مفتحة ف جنــان
بين النخيل والرمـــان
الأطلس واقف شامــخ
يحرسها ويعطيها لمـان
يحضيوها سبع سبوعـه
بركتهم مشروعه
مراكش الحمرة
بهجت لبهـوج
بهجة زاهيــة
ولخواطر فيها مفاجيـه
يا بلاد ما بحاك بــلاد
اهلك كرما وجـــواد
يحبو البسمة بدون عداد
ويامهم أعياد ف اعيـاد
يا زيرها
قلبك يسعد يهنـــــا
بزيارتك لجامع لفنـــا
تما لبساط وغاية النشاط
ولا كنتي
تحب الطبيعة والجمـال
تنزه ف حدائق اكــدال
مدرسة بن يوســـف
تاريخها بحال لهــلال
قبور السعديين
حضارة ورجال
الباهيه تحفة غاليــة
لحضر ليه الرمزيــة
باين فعلو الكتبيـــة
عرج لسوق السمارين
ولغدا شوى ف لقصابيـــن
الظهر فمولي اليزيد يتصـلا
خرج على بـرى بــرى
ف باب الجديد رتاح شويه
وف لمنارة نعم ب العشويه
صلي المغرب والعشــى
فبن جعفر مول الوعـدى
البهجة فجنان العز بـارزة
وعلى قلوب العشاق حارزة
بحسنها وضرافت أهلهــا
فايزة
محبتها من الله جايـــزة
المختار الافغيري