حجاية عازا ومعيزيزا وداكا ومديكيكا والديب

مشرف عدد المساهمات : 243 تاريخ التسجيل : 01/11/2012

حجاية عازا ومعيزيزا

كان حتى كان كان لحبق والسوسان ف حجر النبي العدنان
كانت واحد المعزة عندها ربعة ديال لمعيزات بناتها اسمهم ..عازا .. ومعيزيزا .. دكا .. ومديكيكا .. واحد النهار مشات المعزة للغابة باش تجيب لبهم مكلتهم وشرابهم جا الديب من بعدها وضحك معا لمعيزات الصغار قال ليهم باللي عندو فين يلعبو ويفرحو وينشطو الى مشاو معاه لدارو
وحينت رجعات المعزة كيف عادتها بدات تدق الباب وتقول عازا و معيزيزا داكا ومدكيكا حلو البيت هاني جيت جبت لحليب فبزيزلاتي جبت الربيع فقريناتي جبت الغيس ففريقشاتي جبت الما فقميماتي وحلو الباب هاني جيت ملي عيات تقول وتعيد عرفات باللي بناتها ماكينينش فالدار بدات كتسول الجيران ديالها منهم الدجاجة والنعجة وكداك الارنب حتى وصلات لعند البقرة اللي قالت ليها راه الداهم الديب شعلت فيها العافية و وغواتها سمع لمكان مشات كتجري بلا ما توقف وكا الحيونات تابعينها حتى وصلات لدار الديب اللي كان فرحان وكيتسنا العافية تشعل باش يكلهم وهي تغوت على بناتها عازا ومعيزيزا داكا ومديكيكا هاني هنا سمعوها بناتها وبداو كيغوتو بزاف هنا تاكدات بعدا راه باقي عايشين ةهي تقول الديب الى كنتي ديب عطيني بناتي ونبقاو مزيانين هو كيسمع فكلامها وكيضحك عليها لحقاش عند راسو ضمن مكلتهم وحيت قوات عليه خرج لعندها لقا كل الحيونات مجموعين بدا كيدخل ويخرج فالهدرة وهي تقول ليه الى تبارزتي معايا وغلبتيني خود بناتي الديب مع الطمع اللي فيه قال علاش الا يقتلها حتى هيا غدي يضمن المكلا ديال اليام الماجيا قال ليها تسنايني هاني جاي مشا صاوب لقرون من الرماد وسخنهم على العافية حتى نشفو وخرج لعندها قال ليها هاني طارت عليه المعزة ضرباتو بقرونها طاح للارض وهي تدك قرونها فكرشو سلات معاه والله عاونها عطاها قوة زايدة حيت معاها الحق وهوما يخرجو بناتها كيجريو مكيطلبو منها تسامحهم حينت ما سمعوش كلامها ووصيتها ليهم
ومشات حجايتي مع الواد ورجعت انا مع الجواد
مع تحيات هند