دادة فهيمة

موضوع: دادة فهيمة الخميس نوفمبر 08, 2012 6:08 am

دادة فهيمة

حكي لي يا دادة حكي لي كيف العادة
الليل طويل ما جاني نوم
راني مضيوم راني مهموم
ركبتك وسادة وف لحلام نعوم
حكي لي قصة الكادة حليمة
من غدير عفريت موردة لبهيمة
جاها وصاح شكون انتيا
يا كادة فهيمة يا المحرفة بشريط
كالت ليه جبت ليك هدية
طعام مسوس مدسوس بحليب اللبية
فرنس با نو نيابو شعلت النار تحت كدامو
كال ليها ها تي ها تي لعطية
سربي طلبي راه ليد سخي
كالت لفهيمة يا سيد لعفريت
قاصدة مكانك وعندك جيت
بغيت كرنك ندكو فالحال
ونديرو فعياني كحال
كال ليها يا لطيف منك خزيت
واش انتي اينس نيت
كافرة عديمة ما انتي رحيمة
يا كادة زعيمة
كحلات بان الكنز المنقوش
كالت روغ روغ يا عيروش
كا ل ليها الكنز مرصود بعبد مرعود
جبدات كموسة من لصداف
وجدر مروت جاف
كلت ليه حيد لا تخاف
سمط وفيها شاف
دورات لمكان بخيط كطران
بخرات بشكاف وصلبان
هبشات بظفارها وجبدات قمقوم قديم
كحلات شفارها بحموم خديم
بان عبد بين رماد ودخان
محرف بسيف وصدف ولبان
شير بحزامو نوض عجاج كدامو
لاح لفهيمة لتلت الخالي
بدون رفيق بدون والي
ارجع لكنز لمقامو وبقى لعبد خدامو
فقت من منامي لقيت دادة كدامي
كالت ليا باسم الله عليك
كولي ليا يا ولدي اش جرى ليك

عبد الرشيد عمهم

مشرف عدد المساهمات : 135 تاريخ التسجيل : 19/10/2012

سلم بوحك الاخ عبد الرشيد
اتارتني هده الزجلية لما فيها من حفر في جدور الترات
تحياتي

Admin عدد المساهمات : 1036 تاريخ التسجيل : 11/10/2012

طعام مسوس مدسوس بحليب اللبية
فرنس با نو نيابو شعلت النار تحت كدامو
...........
قرات بمتعان ابداعك السي عبد الرشيد
وجدتك مختلفا تنقب في اعماق الكلمة الجميلة
وهدا حال المبدع
تبارك الله عليك خويا

موضوع: رد: دادة فهيمة الأحد نوفمبر 11, 2012 3:16 am

شكرا الاخ الكريم حسن لمرابطي على مرورك البهي شكرا مرة اخرى

موضوع: رد: دادة فهيمة الأحد نوفمبر 11, 2012 3:19 am

شكرا الاخ المحترم السيد الوسيم المختار الافغيري على طلتك البهية تحياتي